03/11/2025
2025 թվականի հոկտեմբերի 29–31-ը Մարաքեշում (Մարոկկո) կայացավ Համաշխարհային Օդերևութաբանական Կազմակերպության (ՀՕԿ/WMO) Ագրոօդերևութաբանական ծառայությունների մշտական կոմիտեի (Standing Committee on Services for Agriculture – SC-AGR) նիստը։
Նիստին մասնակցում էր ՇՄՆ «Հիդրոօդերևութաբանության և մոնիթորինգի կենտրոն» ՊՈԱԿ-ի տնօրենի խորհրդական Վալենտինա Գրիգորյանը, ով հանդիսանում է SC-AGR-ի հիմնական անդամը։
Քննարկումները վերաբերում էին 2025–2027թթ․ աշխատանքային առաջնահերթություններին՝ գյուղատնտեսական օդերևութաբանական գործելակերպերի ուղեցույցի (GAMP) վերանայմանը, WAMIS պորտալի կատարելագործմանը, ագրոօդերևութաբանական տեղեկագրերի ստանդարտացմանը և թվայնացմանը, ինչպես նաև ազգային հիդրոմետ ծառայությունների և գյուղատնտեսական օգտատերերի միջև հաղորդակցության արդյունավետության բարձրացմանը։
Հատուկ ուշադրություն դարձվեց տարածաշրջանային և միջազգային համագործակցությանը՝ #FAO, #GWP, #UNESCO, #WFP և այլ գործընկերների հետ, ինչպես նաև ագրոօդերևութաբանական ծառայությունների ինտեգրմանը «Early Warnings for All (#EW4ALL)» գլոբալ նախաձեռնության և տարածաշրջանային բազմաբնույթ վտանգների վաղ նախազգուշացման համակարգերի մեջ։
Քննարկվեցին նաև համադրման (cross-cutting) հարցեր՝ կապված SERCOM-ի այլ մշտական կոմիտեների հետ՝ կլիմայական ծառայությունների (SC-CLI), հիդրոլոգիական ծառայությունների (SC-HYD) և աղետների ռիսկի նվազեցման (SC-DRR) կոմիտեների հետ, ինչպես նաև Ենթակառուցվածքների հանձնաժողովի (INFCOM) գործունեության հետ՝ դիտարկումների ստանդարտների, տվյալների ինտեգրման (WIS/WIGOS) և Ինտեգրված մշակման և կանխատեսման համակարգի (WIPPS) շրջանակներում համագործակցության ուղղություններով։
Նիստը կարևոր հարթակ էր փորձի փոխանակման, ընդհանուր առաջնահերթությունների սահմանման և միջկոմիտեական համագործակցության խորացման համար՝ ուղղված կայուն գյուղատնտեսության և պարենային անվտանգության ապահովմանը։
