22/05/2021
ՄԱԿ-ի գլխավոր ասամբլեայի նախաձեռնությամբ հռչակված այս օրը նպատակ ունի միջազգային հանրության ուշադրությունը սևեռել կենսաբազմազանության շարունակական կորստի համաշխարհային խնդրին:
🔸 2021թ. այն նշվում է «Մենք լուծման մի մասնիկն ենք» խորագրի ներքո, որը նախորդ տարվա՝ «Մեր լուծումները բնության մեջ են» խորագրի շարունակությունն է։
Կենսաբազմազանությունը կյանքի բազմազանությունն իր բոլոր դրսևորումներով: Համարվում է, որ երկիր մոլորակը, որպես մարդու և այլ կենդանի արարածների բնօրրան, միակն է, որում կյանք գոյություն ունի, իսկ կենսաբազմազանությունը երկիր մոլորակի կարևորագույն աղբյուրն ու այդ մոլորակի միլիոնավոր տարիների էվոլյուցիայի արդյունքը:
🔸 Կենսաբազմազանության պահպանությունն իրականացվում է բուսաբանական և կենդանաբանական այգիներում, դենդրոպարկերում և այլ կանաչ գոտիներում: Բնությունը հանդիսանում է հավերժական և հարատև արժեք։
🔸 Կենսաբազմազանությունը յուրաքանչյուր տեսակում և յուրաքանչյուր առանձին օրգանիզմում անընդհատ զարգացող համակարգ է, ուստի այն ստատիկ չէ ՝ իմանալով, որ Երկրի վրա երբևէ գոյություն ունեցող տեսակների 99% -ն արդեն վերացել են:
🔸 Կենսաբազմազանության խնդիրները `ամբողջ մարդկության խնդիրներն են. չնայած տեխնոլոգիական առաջընթացին՝ աշխարհի բնակչությունը կախված է էկոհամակարգերի առողջությունից: Խմած ջրի, սննդի և օդի որակը կախված են բնությունից:
Սա այն օրերից մեկն է, երբ ևս մեկ անգամ պետք է վերանայել մեր վերաբերմունքը բնության և կենսաբազմազանության հանդեպ։ Թեև շատերը չեն գիտակցում բնության դերը մեր կյանքում, սակայն դա շարժիչ գործոն է, և կա անհրաժեշտություն վերագնահատել և պաշտպանել այն գանձը, որը մենք ունենք։
📍 Գործում է Կենսաբանական բազմազանության մասին Կոնվենցիան, որը միջազգային պայմանագիր է։ Դրա նպատակն է համակարգել կենսաբազմազանության պահպանության և կենսապաշարների ռացիոնալ օգտագործման, կենսաբազմազանության օգուտների արդարացի և հավասար ու համատեղ օգտագործման ոլորտները:
🇦🇲 Կոնվենցիան ստորագրել է 193 երկիր, այդ թվում` Հայաստանը:
Մայիսի 22-ը ևս մեկ անգամ հիշեցում է, որ մարդկությունը պարտավոր է հետամուտ լինել կենսաբազմազանության պահպանությանը և չեզոքացնել դրան սպառնացող վտանգները, շարունակաբար աշխատել մոլորակի բնակիչների իրազեկվածության մակարդակի բարձրացման, ոլորտին վերաբերվող նորարարական որոշումների ընդունման և կենսաբանական բազմազանության կորուստների նվազեցման ուղղությամբ։
Պահպանե՛նք բնությունը և ապրենք բնության հետ ներդաշնակ:
