22/11/2024
Նոյեմբերի 19-ին ՀՀ ՆԳՆ Ճգնաժամային կառավարման պետական ակադեմիայի ուսանողներն այցելեցին ՇՄՆ «Հայհիդրոմետ» ՊՈԱԿ-ի Օրհուս կենտրոն՝ մասնակցելու Օրհուսի կոնվենցիային նվիրված դասախոսությանը:
Կենտրոնի համակարգողը ներկայացրեց Օրհուսի կոնվենցիայի երեք հիմնական դրույթները՝
շրջակա միջավայրի վերաբերյալ տեղեկատվության հասանելիություն,
հասարակության մասնակցություն որոշումների կայացման գործընթացին,
արդարադատության մատչելիություն:
Դասընթացի ընթացքում շեշտադրվեցին կոնվենցիայի ընձեռած իրավունքներն ու դրանց դերն՝ ուղղված շրջակա միջավայրի պաշտպանության գործընթացին։ Ուսանողներն ակտիվորեն մասնակցեցին քննարկումներին, որոնց շրջանակներում անդրադարձ կատարվեց Հայաստանի բնապահպանական մի շարք հիմնախնդիրներին:
Հատուկ ուշադրություն դարձվեց հասարակության մասնակցության կարևորությանը, որն անփոխարինելի է շրջակա միջավայրի պաշտպանության համար: Օրինակներով ներկայացվեց, թե ինչպես կարող է հասարակական կարծիքն ազդել որոշումների կայացման գործընթացի վրա:
Դասընթացի ավարտին ուսանողները նշեցին, որ Օրհուսի կոնվենցիան իրապես կարևոր գործիք է՝ հասարակության ձայնը բարձրացնելու և շրջակա միջավայրի պաշտպանության գործում իրավական մեխանիզմներ ապահովելու համար։ Ակադեմիայի ուսանողներն ընդգծեցին, որ այս այցելությունը ոչ միայն խորացրեց իրենց գիտելիքները, այլև հստակեցրեց հասարակական ակտիվության դերը բնապահպանական խնդիրների լուծման գործում։
Այսպիսի հանդիպումները հնարավորություն են տալիս նոր սերնդին ծանոթանալ բնապահպանական խնդիրներին և հասկանալ նրանց ներգրավվածության կարևորությունը շրջակա միջավայրի պաշտպանությունում։
